Хакасияда наа фильм тимнелче
Ол «Кем хамны чобат салған?» адалча. Аның сценарийін Анна Гурина 2021 чылда пазып пастаан. Кирек хайди полған? Ағбанда иртчеткен фестивальда режиссёр Михаил Мерзликин, Анназар пастыр киліп, Хакасияда кино суурҷаң кӧңнін искірген. Че ол кинодағы кирек хакас ибіҷекте иртерге, ӧӧн матыр, тізең, хам поларға кирек. Андада сценарист хакас чонның алыптығ нымаанаң, шаманизмнең таныс таа полбаан. Анна Гурина ол нимелердеңер кинделер хығыр сыххан. Іди хысхаҷах фильмге сценарий тимнеп сыххан. Че пір дее ниме киліспинчеткен. Андада Михаил Мерзликин ол тоғысты хайдағ-да тусха тохтат саларға чарат салған. Читіре пазылбаан сценарий тасхахта ікі чылҷа чатхан. Тус читкенде, чайаачылар ол тоғысты хатап алып, хайда-да алҷаастарны тӱзеткеннер, наа кӧрістер хосханнар. Іди «Кем хамны чобат салған?» фильмні суурарға наа «тыныс» азылған. Анна Гурина наа сценарийні чапчаң, ікі ай аразына ла, пазыбысхан.
– Минің кӧрізімнең, фильм кӧрігҷілернің кӧңніне кірер. Сынында прайзы хынған сағызы толзын тіп сағынча. Че пірдеезі таңдағы кӱннеңер сағынминча. Пӱӱн хынған сағыс тол парза, таңда ниме полар? Арса, ам син артых ла чуртапчазың? – чоохтапча сценарист Анна Гурина.
Кинонаң айғасчатхан устарның хайхастығ кибірі пар – наа фильмні суурар алнында табахты полға оода сабары. «Кем хамны чобат салған?» фильмні суурар алнында режиссёр Михаил Мерзликин, «Давайте снимем крутое кино!» ӧрчіліг чоохтанып ала, табахты ползар тастаан. Аар-пеер пытырап парған чардыхтарны постарында артысчатханнар.
– Піс сӱрдестіг триллер суурчабыс. Анда Хакасияда чуртапчатхан хамнаңар чоохталча. Чуртағҷылар хамзар хынған сағыстарын толдыр пирерге сурынарға килчелер. Фильмде ӧӧн матырны, хамны, ойнапча А.М.Топановтың адынаң Хакас драма театрының режиссёр-постановщигі, Хакасияның чон артизі Юрий Майнагашев. Ідӧк хонҷых Тува Республикадаң килген артист Ляна Ондур ойнир. Москвадаң мындағ артисттер килчелер: Марина Федункив, Анастасия Теплинская, Олег Васильков, Антон Зацепин, Янина Мелехова, Ананке Арейру. Алтай паза Тува республикаларның саблығ артизі, Россия киноларында суурынчатхан актёр Амаду Мамадаков наа проектте ідӧк араласча, – чарытхан режиссёр Михаил Мерзликин .
Фильмдегі хам сигіс пулуңнығ хакас ибіҷекте чуртапча. Аның иркінін алтаза, пастап сағынчазың: «Хайдаң ни аны кӧзір килгеннер?» Режиссёрға ол сурығны пиргенде, ибіҷекті хоосчы Олег Залевский пос холынаң чайаан тіп чоохтап пирген, анаң уснаң таныстырған.
– Ибіҷекті «Кем хамны чобат салған?» фильмге декорация оңдайынаң тимнеебіс. Тузаланыстаң сых парған чарытхы тірӧстерін ӱзе кисклеп, ибіҷек иргі кӧрінзін тіп, тоғылах ағастарны сырлаабыс. Піс Хакасияда чуртапчабыс, аннаңар хакас ибіҷектер хайди пӱдірілчеткенін пілчебіс. Минің хакас ибіҷек пар, – чоохтаан хоосчы Олег Залевский.
Ӧӧн матырларның пірсі Тува Республиканың Виктор Кӧк-оолның адынаң Национальнай театрның артизі Ляна Ондур полча. Ол позы Каа-Хемскай кожуунда тӧреен паза ӧскен. Кічігдең сығара артист поларға сағынған. Хынған профессиязына Санкт-Петербургта ӱгренген. Пӱӱнгі кӱнге Тува Республиканың саблығ артизі пӧзік атха читкен.
– Проектте аралазар алнында таллағ ирткем, «Ветер перемен» кинокомпаниязар видео ысхам. Анаң режиссёр мағаа сценарий ыс пирген. Аны хығырғанда, фильмнің темазы кӧңніме чараан, ол мағаа уғаа чағын. Ууҷамның іҷезі хакас полған паза ол хамнаҷаң, – ӱлескен артист Ляна Ондур.
Наа фильм тимде полза, аны хазнаның прай даа кинотеатрларында кӧзідерлер.
Сомда: Хакасияның чон артизі Юрий Майнагашев, Туваның саблығ артизі Ляна Ондур, режиссер Михаил Мерзликин, «Ветер перемен» кинокомпанияның устағҷызы Владислав Кафеевв.
Сом Альбина Чистогашевани
Автор : Татьяна Тютюбеева